So‘nggi vaqtlarda firibgarlar haqiqiy savdo maydonchalariga juda o‘xshash soxta internet-saytlarni yaratish holatlari ko‘paymoqda. Bunday resurslarda foydalanuvchilarga katta chegirmalar, aksiyalar va jozibali takliflar taqdim etiladi. Ularning yagona maqsadi — bank kartalari ma’lumotlarini qo‘lga kiritish va mijozlarning mablag‘lariga ruxsatsiz kirish imkoniyatini olishdir.

Eslatib o‘tamiz, moliyaviy xavfsizligingiz sizning e’tibor va hushyorligingizga bevosita bog‘liq. Taklif ishonchli ko‘rinsa ham, karta ma’lumotlarini kiritishdan avval saytning rasmiy va himoyalanganligiga ishonch hosil qiling.

Quyidagi ehtiyot choralariga amal qilish tavsiya etiladi:
1. Sayt manzilini tekshiring — u https:// bilan boshlanishi va to‘g‘ri domen nomiga ega bo‘lishi kerak.
2. Xatoliklar, shubhali bannerlar yoki o‘chib chiqadigan oynalar mavjud bo‘lgan sahifalarda karta ma’lumotlarini kiritmang.
3. Ishonchingizni qozonmagan yoki vaqt sinovidan o‘tmagan ilovalar va servislar orqali karta ma’lumotlarini saqlamang.
4. Bank xodimi sifatida tanishayotgan shaxslarga hech qachon bank kartangiz fotosurati, pasport ma’lumotlari yoki SMS orqali kelgan tasdiqlash kodlarini yubormang.

Agar saytning haqiqiyligiga shubha tug‘ilsa, hech qanday shaxsiy ma’lumot kiritmaslik va zarur hollarda bankning qo‘llab-quvvatlash xizmatiga yoki rasmiy manbalarga murojaat qilish tavsiya etiladi.

Mablag‘laringizni asrang. Moliyaviy xavfsizlik ongli va ehtiyotkor onlayn xatti-harakatdan boshlanadi.